寒天伯公揹等冷咻咻个北風

【文、圖／張捷明／國立中央大學客家語文暨社會科學學系在職專班碩士】

 

　　寒天伯公揹等冷咻咻个北風，呼～呼～呼～來到桐花森林肚膨尾鼠个屋門口，又跋上半天高个電線楯，佢將電線準五線譜，吹出嗚～嗚～嗚～緊顫个音符。

　　膨尾鼠老弟勼(giuˊ)到樹窿肚，冷到咭咭顫。寒天伯公蒼涼个歌聲，實在得人畏，分佢想起一年四季：該春天阿姐當溫柔，摎世界換新妝；熱天阿哥當熱情，分萬物成長；秋天阿姨當慈悲，讓果子收成入倉，就單淨寒天伯公盡無情，只帶分大地風寒，大家一定都當惱寒天伯公。 　　

　　膨尾鼠老弟就湊大家共下參詳，愛寫信仔投玉皇大帝，希望春天阿姐永遠無愛走，寒天伯公永遠毋好來。 　　

　　樹頂个貓頭鵰博士聽著這个想法，就教大家講：「係無寒天伯公年年天下行一輪，田肚个害蟲愛喊麼儕除？動物个體格愛請麼儕來鍛練？春天阿姐个溫柔愛仰般來表現？若(ngiaˊ)公毋係有教過汝兜，只愛先有春耕夏耘，就會有秋收冬藏，就毋驚霜雪十二月冬。」 　　

　　貓頭鵰博士接等又講：「寒天伯公毋會恁緪(henˇ)心，佢逐年愛轉該下，總係先拉動風爐起火，趕春天阿姐來到該央時，還分大家燒暖个天時。寒天伯公面冷心熱無人知，其實四季分明逐儕都係好心腸。」聽了貓頭鵰博士个解析，這下大家正知得，寒天伯公年年分人拗枉還係年年來，實在當偉大。 　　

　　故所到今，年年還係春夏秋冬四季輪等來，膨尾鼠老弟也年年跈等阿公，趕秋天栗仔成熟時，煞猛撿轉樹窿肚，囥(kong)等好安心過冬。到了寒天北風來時，佢還愛認真聽等窗門外背寒天伯公講个古──寒天伯公講佢適銀色世界旅行時，堵著盡多盡多面對困苦、堅耐打拚个感動故事，講愛一樣一樣講分膨尾鼠聽。






　

▲BACK